الرياضة اليوم
عيشها .. صح
روشتة عشان تعيش مرتاح
١. عيش اللحظة
خلي عقلك دايماً مركز في اللحظة، عيشها بكل حواسك .. استمتع بالنعمة اللي انت فيها .. حس بألمها لوحدها من غير ما تزود ألمها بألم لحظات تانية .. متربطش لحظة قديمة بجديدة.. متربطش لحظة عايشها بمستقبل مش واضح .. عيش اللحظة وبس.
٢. نافس نفسك
اسجن عقلك في تصرفاتك وبس… متبصش كتير على اللي حواليك .. لما تحس بتهديد عشان غيرك نجح، ادعيله بالبركة وركز في اللي بتعمله .. فكر نفسك اننا مختلفين وبصماتنا مختلفة .. ممكن كل الناس تنافسك في نفس محيطك ونفس مجالك .. ويفضل كل واحد بصمته مختلفة .. والرزق مختلف لاقبال الناس .. واللي يخلي عملك متميز تركيزك على تطويره… تركيزك على الإرتقاء فيه… تركيزك على اداؤه صح من غير ما تلتفت لغيرك.
٣. راقب تصرفاتك
بلاش تتحبس في تصرفات الناس… كلنا بشر بنصيب ونخطأ .. بلاش تفضل محبوس في خطأ كل انسان في حقك .. خد من خطأه لتعرف عن نفسك واتعلم من الموقف .. خلي يومك كله داير في انت بتعمل ايه ؟ مش هما عملوا فيا ايه!
٤. متخافش من الألم
انت عايش في دار بلاء … الألم جزء من الحياة .. الألم جزء من السعادة .. لما تواجه ألمك وتحتويه وتتقبل وجوده… هيفك ويتحرر .. ولو فضلت رافضه هيعشش جواك ويقلب حياتك جحيم متحرك .. هيخلي قلبك يسوّد وتكره نفسك واللي حواليك .. تقبل الألم افهم عن نفسك من خلاله … هيمر .. ويسيبك مرتاح البال .. واقوى
٥. عيش سعادة حقيقية، مش لحظية
اى سعادة من غير ألم اسمها نشوة لحظية تبعاتها حسرة وضيق في القلب .. لانها من شهوة .. والشهوات دورها في الارض تديك لحظة واحدة سعيدة ولازم وراها عواقب مؤلمة.. الاكل وراه مرض.. الاستمتاع وراه ضياع وقت… الخ.. سنة الكون عشان متنساش انت مخلوق ليه .. الكتالوج انت مخلوق عشان تنتج.. عشان تسيب بصمة وهو ده اللي يخليك سعيد وبس بشكل دائم .. اهتم تكتر من السعادة الحقيقية … السعادة الحقيقية في الاستسلام لقضاء الله .. في تقبل الألم والنقص .. السعادة الحقيقية في الإنجاز .. وفي العطاء .. السعادة الحقيقية انك تعيش عامل اللي عليك .. وتاخد بالأسباب باللي في إيدك تعمله واللي خارج استطاعتك تسيبها على ربنا يدبرها ومتقلقش نفسك بيها ..
٦. اتعلم من غلطك
متتعطلش من غلطك .. الغلط جزء كبير من التعلم .. اتعلم منه وكمل.. مش هيفيد في شىء انك تفضل تأنب نفسك وتموتها عشان غلطت .. خليك حنين على نفسك انها غلطت .. وحازم وصارم معاها في انها تصلح غلطتها .. وبكده تبقى اتعلمت .
٧. رزقك مكتوب
متقلقش نفسك اوي برزقك .. الرزق مش بس فلوس.. الرزق في كل حاجة نفسك فيها .. اسعى في اسبابها وبس .. متقلقش نفسك هتيجي ازاى ولا هتستحمل تعيش من غيرها ازاى .. كل لحظة بتعيشها ربنا هيقدرك عليها .. خليها يقين عندك.
٨. اجبر نقصك بالله
العبادة بتقويك وبتخليك قادر تستحمل البلاءات وصعوات الحياة اكتر… اعتبرها شحن لك .. لما بتعملها بتنفع نفسك… ربنا غني عنا صدقني .. فبلاش حوار بصلي لله .. انت بتصلي مخلص عبادتك لله ولكن ربنا مش منتظر صلاتك… انت بتصلي عشان نفسك محتاجه الصلاة عشان تبقى اقوى.. وقياسا باقي العبادات .. فكل ما تحس بوجع او نقص في احتياجاتك ادعي ربنا ..
٩.حياتك مش هنا
افتكر ان الحياة مش مستمرة هى مجرد محطة لحياتك الحقيقية .. وان استعانتك بالله في اللي ناقصك انه يلطف على قلبك بعدم وجوده هو اللي يخليك تتحرك وتكمل دورك اللي اتخلقت عشانه.. متخلقناش عشان نقضيها وبس في شهوات زائفة .. اتخلقنا عشان نعيش بننفع الآخرين … ونبني حياتنا في الجنة .. الدنيا بنزرع فيها.. وفي الجنة الحصاد .
١٠. تغافل
التغافل يريحك ويريح الناس .. بلاش تقف على الواحدة .. ومتكبرش المواضيع .. طنش شويتين .. مفيش حاجة بتمشي بالمسطرة .. مش عليك غير البلاغ .. ده قانون،٨٠℅ من التربية تغافل .. التربية لتفسك او لغيرك .. التغافل مش معناه التكبير… التغافل معناه عدم اصطياد الأخطاء .. وملاحظة الصح اكتر من الغلط .. وانك لما تصلح غلطة، مش عليك اصلا تشوف نتيجة .. بلغ بطريقة صح .. وتغافل
١١. ركز في النعم المنسية
ركز في الايجابيات والنعم وحسها.. استمتع بالتفاصيل الصغيرة .. ببطانيتك وقت السقعة .. بكوباية سخنة تشربها .. بسمعك .. ببصرك .. بهدوء الدنيا بالليل .. بلحظة سعادة رزقت بها .. بانك قادر تمشي لوحدك مش متسند .. انك بصحتك .. بوقت الاستحمام يمية سخنة .. ركز في كل نعمة موجودة حواليك ومن كتر ما اتعودت عليها نسيتها .. لما تلاحظها هتحس بهدوء نفسي وسعادة مالهاش حل .. وقرة عين
لما نعيشها صح.. نعيش مرتاحين
