الرياضة اليوم
سيف جعفر يتغيب عن تدريبات الزمالك
تحدث الإعلامي خالد الغندور، حول غياب سيف فاروق جعفر لاعب فريق كرة القدم الأول بنادي الزمالك، عن تدريبات الفريق الأبيض خلال اليومين الماضيين.
وأضاف الغندور خلال برنامجه «ستاد المحور» :«سيف بقاله يومين مش بيروح تدريبات الزمالك.. وزعلان شوية من الموقف اللي هو محطوط فيه».
وتابع: «طبعا سيف كان بيشارك في التدريبات الفردية مع المستبعدين اللي هما سامسون ومحمد عاطف ومهاب ياسر والمدافع الشاب أحمد رفاعي، سيف كان جايله عرض صربي والزمالك رفضه».
وكشف الغندور عن سر رفض العرض الصربي لسيف فاروق جعفر قائلا: «العرض كان هيبقى إعارة مجانية لمدة موسم والزمالك رحب ولكن بوضع بند شراء بمبلغ مالي كبير والنادي الصربي تحفظ على ذلك وفشل الانتقال».
واستطرد: «وكان يملك عرض إعارة من غزل المحلة واللاعب رفض يروح المحلة كان في كذا نادي تاني بس الأمور مش ماشية».
واستكمل: «الأزمة أن جوميز مدرب الزمالك شايف إن اللاعب من الأفضل أن يخرج إعارة أو بيع لأنه صعب ياخد فرصة.. في نفس الوقت الإدارة لما شافت أن اللاعب ممكن ميخرجش إعارة سجلته في القايمة الأفريقية والمحلية تحسبا لبقائه، واللاعب زعلان بقى لأن بيتكلم مع الإدارة يقولوله المدرب اللي مش عايزك ويتكلم مع المدرب يقوله الملف مع الإدارة. والحقيقة إن جوميز هو اللي شايف أن سيف يخرج يلعب أفضل بدل ما يفضل دون أي فرصة للمشاركة».
